祖記馬體會一團「和」氣

猪拉多纳

今晚歐聯A組重頭戲，祖雲達斯迎戰馬德里體育會，「斑馬軍團」為意甲一哥，馬體會則為西甲衞冕王者，兩大班霸碰頭肯定踢到飛沙劈石？未必！事關佢哋今場和波就可以「雙贏」，根本大家都唔使搏到盡，2.8倍和波小試無妨吖！

（有線64及203周三凌晨3:45直播）
祖記拎1分夠晉級

「斑馬軍團」喺A組有9分在手排第2，咧住第3嘅奧林比亞高斯3分，今場和波就可以鎖定出線資格。雖然祖記今場以兩球差距擊敗馬體會嘅話，就能夠壓過對方以首名出線，但萬一過分進取搞到輸波收場，另邊廂嘅奧林比亞高斯又成功砌低馬模，「斑馬軍團」就會降格踢歐霸盃，相信主帥阿里基識得捨難取易，實行踢穩陣波求平安晉級。

馬體會家陣以12分排喺榜首，篤定躋身淘汰賽，只要唔輸就首名出線，冇必要搏命。再者，馬體會連同今場在內，已經連續踢第3場作客波，今場造訪意大利與其爭取「無謂」嘅勝利，倒不如留力踢西甲好過，既然兩軍都係求和，個和波抵博吖！

歐聯A組