羅馬上盤噬曼城

猪拉多纳

聯賽紮炮 等歐聯開餐

「月」黑風高餓「狼」發惡夜！今晚歐聯E組末輪生死戰，「紅狼」羅馬主場死拚曼城，雙方為出線必定搏甩髀，不過作客嘅「藍月亮」傷兵滿營，其中弗爆王牌阿古路受傷打擊極大，實在好難擋得住成班餓「狼」瘋狂廝殺，羅馬小讓平半值得捧場。

（有線61及201台周四凌晨3時45分直播）

日前英超最慘情一幕，相信係曼城前鋒阿古路對愛華頓開波冇耐被撞到左膝扭曲，要立即退下火線，見到佢眼紅紅喊晒口，真係陰功豬！有傳阿Kun要養傷一個月，今仗肯定唔使預佢。阿Kun對曼城有幾重要？單計今屆歐聯分組賽，若果扣除佢五個入波所帶來分數，「藍月亮」隨時連一分都攞唔到，更遑論出線機會呢！難怪領隊比歷連尼都為今仗皺晒眉頭。
藍月亮主將非傷即停

曼城唔單止冇阿古路，另一前鋒迪斯高啱啱好番亦唔慌有態，中場核心耶耶托尼仲要坐波監，隊長高柏尼、中場大衞施華及祖維迪亦上陣成疑，況且曼城想晉級除咗要贏羅馬之外，仲要望篤定出線嘅拜仁唔好輸畀對賽成績較佳嘅莫斯科中央陸軍，變數實在太多，萬一收到同時間開賽嘅中央陸軍領先緊拜仁嘅消息，隨時影響曼城球員比賽心情。

相反，羅馬目標鮮明得多，只要擊敗曼城便肯定出線，毋須理會「拜莫戰」比數；主帥魯迪加西亞有先見之明，日前聯賽對薩斯索羅嘅正選陣容，托迪、艾殊利高爾、尼恩高蘭、施度基達及謝雲奴等主力統統冇影，後三者只喺下半場後備入替，擺明留力砌「藍月亮」啦！其中38歲隊長托迪今屆不斷刷新歐聯最老「士哥拿」紀錄，抖到夠又係時候嚟料。
羅馬主場惡到暈

睇番羅馬今季各項主場比賽，錄得八勝一和一負佳績，唯一輸波係對住勁旅拜仁，今仗成班餓「狼」以逸待勞，絕對唔赦傷兵滿營嘅曼城，羅馬小讓平半合理，上盤乃不二之選。此外，由於大家都要搏盡爭勝，勢必合演入球騷，不妨敲埋大盤。