車仔收油唔阻士砵亭

猪拉多纳

剛喺英超被破不敗身嘅車路士，今晚會喺主場同葡超士砵亭踢歐聯分組賽G組最後一場賽事。「藍戰士」雖人腳鼎盛，但由於已穩奪首名出線，今仗未必去盡。至於士砵亭只需1分就可出線，今仗作客相信踢得非常保守，度士睇好佢哋有力全身而退，讓球主客和車路士讓一球，當然係捧讓球客勝。

（有線62及202台周四凌晨3時45分直播）

車路士啱啱喺英超畀紐卡素打破不敗金身，隊波谷埋一吐火，梗係想喺今場盡情發洩。不過，由於「藍戰士」喺歐聯已肯定取得首名出線，今仗完全唔使搏，主帥莫連奴相信會畀一眾主力抖吓，養精蓄銳迎接嚟緊嘅英超快車賽程，故今仗大有機會多派副選「應酬」。
戰情料沉悶膠着

士砵亭現時喺G組5戰得7分排第2，以兩分之差壓住德甲史浩克，今仗只要和波就可以取得小組次名資格。士砵亭近6仗取得5勝1和佳績，可見球隊狀態甚弗，今仗雖有後衞薛迪列卡度停賽，而翼鋒拿尼有傷或要紮住上陣，加上只要唔輸波就可以出線，相信唔會踢得太進取。士砵亭但求唔輸，撞正踢風流波嘅車路士，預計戰情會落入膠着和沉悶，讓球主客和車路士要讓一球，咁當然有利士砵亭讓球客勝，進取嘅仲可以捧埋有3.65倍和波添！