不敗金身被破怒火戰車撞散士砵亭

猪拉多纳

車路士上周六喺聯賽贏形勢輸波，被紐卡素打破今季不敗金身，領隊莫連奴當然唔忿氣。就算球隊已經鎖定歐聯16強席位，今晚主場出擊肯定唔會放過G組對手士砵亭，1.53倍主勝信得過。

（有線62及202周四凌晨3:45直播）
和波都晉級 士砵亭防線唔爭氣

車路士上場作客紐卡素全場壓住對手嚟攻，射門次數更加係對方3倍，偏偏輸波收場，試問一眾藍戰士條氣邊會順吖！或者大家擔心佢哋出咗線會留力，不過莫連奴賽前暗示好大機會續用迪亞高哥斯達掛帥，就算寸王真係出口術，都仲有連續2仗「士哥」Fit到震嘅杜奧巴擔大旗，入波唔成問題喎！

對手士砵亭目前以2分優勢壓住第3位嘅史浩克04，雖然佢同史浩克對賽成績同樣係1勝1負，但由於對賽入球數字佔優，所以士砵亭拎到1分即可出線，之但係呢支葡超球隊喺歐聯5戰場場失守，防線堅信唔過。更何況佢哋今次除咗守將薛迪列卡度要停賽之外，仲有翼鋒拿尼受傷，星期二都冇操到，冇咗呢對攻守主力，仲點頂得住呢部殺氣騰騰嘅怒火戰車先？