里爾跌watt注定捱細界

猪拉多纳

H組愛華頓肯定首名出線，餘下一席由里爾同禾夫斯堡爭奪，主場嘅里爾落後對手三分，換言之今仗必須贏波先可出線，但呢支法甲球隊已連續十二場不勝，想贏恐怕有心無力。禾夫斯堡和波都掂，作客冇必要冒進，讓波制唔過，寧揀1.68倍入球細。

（有線61及201台周五凌晨4時05分直播）

10/11年球季法甲冠軍里爾星散後，實力每況愈下，今季聯賽已跌至下游，隨時有降班危機。歐霸盃分組賽五戰未贏過，各項賽事已累積十二場不勝，今仗有主場之利背水一戰，仍然有得受讓，可見莊家對佢哋爭勝意欲都存懷疑。事實上，以里爾目前低迷境況，歐霸盃出局可謂減少一大包袱，對球隊來說反而係好事，未必會去盡搶攻。
禾夫斯堡睇定嚟踢

禾夫斯堡今季大勇，佔據德甲次席，理應可以秤先，但問題係佢哋今仗唔需要贏都可出線，不宜高估。禾堡首席射手奧歷畢竟已經三十五歲，近期演出回落，值得一提，佢喺今屆歐霸盃仲未開齋，要咬入里爾亦唔易。雙方首循環打和1比1，再追細盤。