熱刺保首名搏命唔「錫」身

猪拉多纳

歐霸盃C組爆發首名爭奪戰，土耳其「一哥」比錫達斯喺主場對嚟自英超嘅熱刺，讓平半要唔過，因為比錫達斯食胡射手丹巴巴亞除咗被利物浦睇中，可能重返英超，仲要剛啱傷埋，相反熱刺領隊普捷天奴諗住嗌高層開水喉買人，呢個時候梗係要大打爭氣波，增加擴軍籌碼啦！

（有線61及201周五凌晨2:00直播）
比錫達斯丹巴巴亞打柴

其實C組形勢好簡單，卓普利斯同柏迪遜篤定出局，比錫達斯落後熱刺2分，今場贏就首名，失分就次名，可惜佢哋即使想爭，恐怕都有心無力，事關加盟後勁入波嘅丹巴巴亞，最近成為利物浦收購目標，好可能打擊到佢哋嘅士氣，更慘嘅係，佢喺比錫達斯日前以3:0砌低特拉布宗嘅土超賽事，入完波後傷鬼埋！

熱刺喺英超演出比較飄忽，但踢歐霸盃分組賽就有3勝2和，而且新領隊普捷天奴已經放風話，希望趁1月轉會市場重開，買埋佢嘅修咸頓舊部屬積洛迪古斯同舒尼達連，咁講法，佢梗係要交成績嗌高層畀錢，就算熱刺依然傷兵滿營，相信都會諗辦法保住個首名，受讓平半玩得過。
歐霸C組