皇馬搵艾美利亞祭旗

猪拉多纳

延連勝紀錄 壯世冠行色

喺遠征非洲摩洛哥爭奪世界冠軍球會盃冠軍之前，「銀河艦隊」皇家馬德里先踢西甲，將於周六凌晨客戰艾美利亞，各項賽事已經連贏19場嘅皇馬不但要為世冠盃壯行色，仲要挑戰埋最長連勝嘅健力士世界紀錄，今場對住剛炒教練嘅艾美利亞，讓兩球都照捧！

（now 632及TVB 13周六凌晨3時45分直播）

皇馬繼續銳不可當，雖然已經鐵定首名出線歐聯，但上場都唔放過大炒盧多格德斯嘅機會，19連勝創出西班牙球壇最長連勝成績，但「銀河艦隊」又點會滿足於此，球隊只要贏多6場，就可以破埋巴西球隊哥列迪巴創下嘅24連勝健力士世界紀錄，況且皇馬依家喺西甲僅以兩分領先死敵巴塞隆拿，奪冠言之尚早，所以對手不論強弱，佢哋都要一一擊破！

皇馬今場縱有後衞沙治奧拉莫斯停賽、中場占士洛迪古斯同莫迪歷養傷，但隊中王牌C朗拿度繼續瘋狂士哥，佢入波已經唔係為咗幫「銀河艦隊」贏波咁簡單，仲係為咗不斷刷新嘅入球紀錄，艾美利亞聽做炮灰！
艾軍剛炒教練立立亂

艾美利亞狀態曳爆，近7場西甲輸咗6場，上場畀伊巴大炒5比2後，球會高層決定將教頭法蘭斯高落鑊，搞到操練要搵體能教練沙治奧柏杜主持，艾美利亞話就話今場賽前就會委任新帥，但新帥連操都未操過，完全唔知班球員有咩特性就要帶隊戰皇馬，真係輸少啲都偷笑啦！