皇馬-2照攞美彩

猪拉多纳

贏到唔識停誓破連勝紀錄

「西甲星期五」難得有「銀河艦隊」出動，艾美利亞今晚鬥皇家馬德里，有主場之利都隨時變炮灰，事關佢哋個教練法蘭斯高剛啱落鑊，連操練都只能由體能教練沙治奧柏度主持，既然皇馬等住破健力士連勝紀錄，喺呢場2014年嘅西甲最後一戰當然唔會放過對方，「-2」照捧「讓球客勝」！

（now632台及TVB13周六凌晨3:45直播）

現時艾美利亞喺西甲排第17位，將近跌入降班區域，經過近7場聯賽得1和6負，高層終於宣布炒教練法蘭斯高魷魚，據講今場要由體能教練沙治奧柏度領軍。本身艾美利亞形勢上已經好牙煙，加埋佢哋喺近3次對「銀河艦隊」全部輸晒，每場仲至少淨輸4球，包括11年作客慘輸1:8，恐怕今戰想輸少啲都難。
艾美近3次對賽輸晒 每場最少失4球

皇馬周中喺歐聯主場以4:0大勝盧多格德斯，打破死對頭巴塞隆拿喺2006年創造嘅西班牙球會18連勝紀錄，依家球迷希望皇馬可以成為世界足球史上連勝場數最多嘅球會，目標係打破埋哥列迪巴喺2011年創造嘅24連勝紀錄，呢個亦係「健力士世界紀錄大全」認可嘅足球界球會最長連勝紀錄，論士氣皇馬肯定氣勢如虹。

雖然皇馬有「J神」占士洛迪古斯受傷，佢中場拍檔莫迪歷又未好番，又有中堅沙治奧拉莫斯要坐波監，不過以佢哋目前「順到冇朋友」嘅強勢，C朗又要繼續入波為再攞國際足協金球獎造勢，相信會繼續力爭大勝，以強勢為去摩洛哥踢世冠盃做足準備，點睇都唔似會喺呢個時候揸流攤，今鋪遇魚腩唔劏等幾時？
盤路解碼

皇馬近7場「讓球主客和」5次開「讓球勝」。