森淼獵鷹長好過短

不死鸟

薛達志馬房K383「森淼獵鷹」，睇馬名都知係「森淼盛」同主新貨，見其廬山真面目，可能會認錯係同馬房「善戰」，栗色馬配白鼻樑，好在仲有四蹄踏雪來分辨，事實上「森淼獵鷹」嘅毛色、外型，同其他Ishiguru子嗣「化工之昇」、「新薪」好唔同，老豆同阿媽都係棗色馬，偏偏遺傳咗外祖父Deputy Governor嘅栗色，都算破格咯！
「森淼獵鷹」在紐上陣5次，頭3場1200米得2亞1季，其後兩戰1400米分獲冠亞，影片所見每次都係跟前，用平均速度完成，這便解釋到初時跑1200米，拉士總係唔夠對手衝，反而增程跑1400米，展示到本身段段貫注嘅能耐，性能上與同父馬「化工之昇」、「新薪」都好唔同。而且追溯番，原來媽媽與「億之傑」份屬全姐弟，匹馬2000年來港由簡Sir訓練，3歲時贏2000及2200米，故唔排除「森淼獵鷹」將來可越跑越長，目前評70分應有上升空間，考慮到薛達志練馬唔會太急進，初期上陣相信只求摸索，所以要畀耐性，等有接近表現才留意都未遲。