英冠盤王般尼茅夫唔驚紅軍

猪拉多纳

12場不敗開盤手都估佢唔到

英聯盃8強又有好戲睇，英冠盤王般尼茅夫喺主場對英超落難班霸利物浦，受讓平半抵撐。雖然般尼茅夫名氣欠奉，但最近佢哋成為英冠盤王，連續7次足智彩開「讓球」全部贏盤，相反紅軍已經輸到慌，領隊羅渣士仲搵門將米洛列特做替死鬼，士氣直插谷底要唔過。

（TVB301周四凌晨3:45直播）

般尼茅夫上季喺英冠排第10位，升班附加賽都冇份踢，點知今季突然大翻身，現時位列榜首，兼且連續12場不敗，叻到連足智彩開盤手都估佢哋唔到，連續7次開「讓球」畀佢哋贏盤，變身英冠盤王，射手哥林威爾遜賽前更加話，要打沉利物浦嚇大家一跳添！
「讓球」盤7連勝

雖然般尼茅夫喺上一圈以2:1淘汰西布朗，派出好多副選球員，但利物浦上一圈以2:1險勝史雲斯，何嘗唔係收起好多主力。加上紅軍喺聯賽淨吞3蛋後，已經全面告急，跟手佢哋要喺聯賽主場硬撼阿仙奴，再輸嘅話領隊羅渣士隨時係咁先，我又唔信紅軍今場會用最強陣容囉！
亂龍利記跟手撼阿仙奴

更慘嘅係，利物浦領隊羅渣士近排嘅排陣充滿爭議性，無論球員定粉絲都開始唔撐佢，首先史達寧打正前鋒始終畀唔到人信心，其次門將米洛列特被貶後備，更加令人覺得羅渣士搵人做戰績差嘅代罪羔羊，難怪高層已鎖定4個新領隊人選頂佢個位，家陣利物浦立立亂，要唔過。
盤路解碼

紅軍近8場「讓球主客和」得1次開「讓球勝」。
Data King：紅軍14戰半場得1勝

‧上屆英足盃般尼茅夫喺第4圈主場以0:2不敵利物浦。

‧般尼茅夫連續4場開入球大，期間攻入11球。

‧般尼茅夫連續12場不敗，當中有9勝3和。

‧利物浦近14場得1次半場領先，其餘9次打和、4次落後。
乜都玩錦囊：利記頹「細」前鋒冇入波

利物浦已跌入信心谷底，而且自賣走蘇亞雷斯，同埋史杜列治養傷後，幾乎冇前鋒識得入波。今場斷估佢哋都唔會用最強陣容應戰，火力更加冇保證，假如大家信唔過般尼茅夫，或者2倍入球細值得考慮。