紐卡素作客唔掂熱刺回勇追W

猪拉多纳

今晚英格蘭聯賽盃8強上演唯一全英超對碰，熱刺坐鎮白鹿徑恭候紐卡素。「喜鵲」早前主場打破車路士不敗金身，咁叻仔當然抵讚，弊在佢哋近期作客踢落唔對辦，睇怕難阻重返正軌嘅熱刺贏波晉級，放心捧1.72倍主勝。

（TVB302周四凌晨3:45直播）
喜鵲殘陣出3號門將

紐卡素近期作客勁曳，對住阿仙奴同韋斯咸兩支前列分子輸晒，即使鬥下游嘅般尼都只能夠和波收場。之前兩圈孭飛踢英聯盃嘅阿比特同奧巴坦受傷唔在講，就連正副選門將告魯爾同洛艾利洛都打埋柴，今場要以3號門將安尼克把守最後一關，兼且右閘真密特黃牌夠數要坐波監，作客唔掂加上陣容不整，真係好難捧得落手。

熱刺上輪英超作客史雲斯，靠哈利卡尼同基斯甸艾歷臣嘅入波，結束3場不勝兼食白果嘅頹勢，今晚返到主場勢必趁機再下一城。雖然按照主帥普捷天奴之前嘅排陣，基斯甸艾歷臣未必落場搏殺，但仲有哈利卡尼同蘇爾達杜孭起鋒線，安祖斯唐辛同艾朗連儂兩翼側擊亦夠煞食，要擊敗「喜鵲」非難事。