奧克蘭半隊業餘兵讓主 聖羅倫素開硬

猪拉多纳

阿根廷傳統「Big5」之一嘅聖羅倫素，今晚會同奧克蘭喺4強會師，爭奪餘下一個世冠盃決賽席位。兩隊波實力爭幾條街，加上聖羅倫素有好波之人羅馬洛尼趕及披甲，睇怕奧克蘭嘅摩洛哥「神奇之旅」係時候畫上句號，聖羅倫素1.6倍「讓主」趁熱食。

（翡翠台及TVB13周四凌晨3:30直播）

4個月前奪得創會史上首個自由盃錦標嘅聖羅倫素，上星期五已抵達馬拉喀什開操，哥倫比亞中堅耶比斯左腳足踝有傷，但錫圖可以頂佢個位，對防線影響唔算大。最重要係羅馬洛尼克服手肘傷可以候命，呢位中場指揮官一直希望同士砵亭師弟C朗喺決賽交手，預期佢實會施展渾身解數。佢哋個門將托列高話，佢跟足晒奧克蘭今屆世冠盃嘅比賽，強調唔敢輕敵，睇嚟呢支南美勁旅已經做足晒功課啦喎！
奧克蘭望教宗唔好保佑聖羅倫素

冇錯，奧克蘭接連踢走摩洛哥勁旅麥靴比體育會同非洲冠軍施迪夫，首度殺入世冠盃4強，係威係勢，但佢哋有幾多料大家心照，畢竟呢班波只係正式成立咗10年，陣中得9位球員係職業，對住自由盃盟主聖羅倫素想再創奇迹？難啲喎！陣中「皇馬躉」貝蘭加賽前話，對聖羅倫素嘅踢法毫無頭緒，只係覺得對手係「另一個層次」，仲話希望教宗唔好保佑聖羅倫素，睇嚟未開波已經先扯白旗。