新薪質素深不可測

不死鸟

昨日講及文家良馬房Ｋ布馬「長勝」質素高，來季成熟後大把世界有排贏，今日講同?另一匹Ｋ布馬「新薪」（上圖），此駒實力與「長勝」不相伯仲，今季如果成熟及進度理想的話，一樣可以連場報捷取得佳績。
「新薪」上季6戰，除初出首仗跑田草1000米直路賽落敗三甲不入之外，其餘5仗得2冠1亞2季佳績，顯見呢匹ＰＰＧ精英演出忠心，睇回首戰落敗，主因是牠狀態不足，加上稚嫩走規欠順所致，落敗可理解，但牠經過一場實戰，態況雖然有進，但練者文家良不急於遣派牠上陣，只係集中將操練加強，令到馬匹狀態更進及出腳有力才再上陣，相隔一個月安排牠轉戰谷草1200米，輸給路程專家「好玩」得第2有點令人驚喜，稍為成熟點即展示出威力，反映呢匹3歲仔實力不簡單。
之後相隔一個月又安排牠跑回田草1200米，臨場賠率只得2.2倍，比起之前兩仗分別33及11倍有天淵之別，顯見呢仗幕後信心十足，果然飛到馬到以一又四分一馬位擒下「尊皇騰龍」贏來易如拾芥，顯露超4班級數。贏完呢場4班賽後，升上3班作戰3仗取得1冠2季全入圍，反映實力強方可為。展望今季踏入4歲，成熟必會更進及有大幅進步，上季兩勝分別在田草及谷草1200米，可見牠性能廣泛不受場地限制，此駒質素起碼值2班，今季值得長線追捧。