金紫荊跑均速煞食

不死鸟

目前養馬量達到63匹之徐雨石，經過上季成功換血之後，加上季尾一批質新開始嶄露頭角，今季要取得好成績重新躋身三甲並非不可能，看季尾6月7日沙田賽事，徐雨石就憑「金紫荊」及「綠茵勁贏」兩匹質新馬包辦第一口孖寶。前駒其實早於總場次480已經露過一手，起步未幾已經進佔首位，只是鞍上人冼毅力刻意留守沿欄4、5位之間，直路雖然一度看似可以進佔第三名，結果半推半就之下以梗頸過終點，相信起步一剎鞍上人肯爭取領先，這個第三名未必屬於「威振神駒」；無論如何，經此一役騎練已經心中有數，翌仗原班人馬再爭1200米，礙於抽外檔全程走中外疊蝕上加蝕，無表現自然情有可原。
冷不防馬房收埋個半月，睇準田草1000米直路賽有「雙辣」掩護下爆冷成功，看本身早段仍不受操控，直路開順腳卻越跑越勁，3歲仔擺明憑質搭夠，倘若轉型改跑均速肯定更加煞食，2W已是保守估計。