阿聯捧完盃乘勇搶Ｗ

猪拉多纳

剛勇奪澳足盃嘅阿德萊德聯，今日造訪喺聯賽仲未開齋嘅紐卡素噴射機。「阿聯」現時氣勢如虹，今仗就算作客都有力擊敗有唔少球員受傷停困擾嘅噴射機，阿謙睇好阿德萊德聯反客為主，捧客W！

（有線64及203台周五下午4時40分直播）

阿德萊德聯上周聯賽主場不敵布里斯班獅吼，但睇番當日嘅出場陣容，球隊其實收起咗一批主力，無非係留力應付周中嘅澳足盃決賽，結果亦如佢哋所願，阿德萊德聯順利擊敗珀斯光輝捧走澳足盃。
噴射機殘陣飛唔起

噴射機上仗作客0比2輸畀珀斯光輝後，今季仍未「開齋」，想要爭前6出戰季後賽機會愈來愈渺茫，尤其係球隊近期傷兵不斷增加，上周因傷缺陣嘅後衞泰萊列根及中場馬高斯科利斯今仗上陣成疑，而另一中場施利斯基則因鼠蹊受傷可能要抖1個月，後衞查利安斯則喺上周領紅後要停賽，今仗要翻身並唔樂觀。

計實力阿德萊德聯已高出噴射機一班，加上後者現時受到傷兵困擾，就算有主場之利亦難反彈，阿謙睇好阿德萊德聯可繼周中賽事後再贏一仗。