5大聯賽聖誕派對鍊盡佢

猪拉多纳

西、意、德、法、荷甲踢完今晚聯賽，就會歇冬告別2014年！做咗領隊嘅兩位前拉素隊友施蒙尼、文仙尼各領風騷，引領大家周日開「派對」，五個聯賽雄師歇冬前最後一擊，誓要做齣好戲，為今年畫上美好句號，開心過聖誕歡度新年，2015再見！
馬體會跌Watt 半場悶親畢爾包

「床單軍團」馬德里體育會今季開咧前被撬走多名主力，唔似得上季咁強勢實屬正常，今場作客雖遇上「私房菜」畢爾包，但馬體會近三場不勝，又冇咗射手文迪蘇傑同中場佐治高基兩大主將，比賽初段好大機會同畢爾包陷入僵局，捧半場和啱數！

（now 632周一凌晨4時直播）
文迪蘇傑缺陣影響大

馬體會今季失去鋒霸迪亞高哥斯達、埋門把握力極高嘅韋拿、鋼龍泰拔高圖爾斯、能攻擅守嘅左閘菲臘路爾斯等主力，成績當然不及皇家馬德里同巴塞隆拿，但主帥施蒙尼能夠喺失去咁多主力之下，仍然帶領馬體會排西甲第三位，已經好有交代。馬體會今季強勢收斂係事實，難再好似上季咁四戰畢爾包全勝。睇返近期狀態，畢爾包肯定比馬體會好，畢爾包近三戰錄得兩勝，而且防守力強，不過更重要都係「床單軍團」今場有兩大進攻泉源文迪蘇傑同佐治高基停賽，更難攻破對手大門。

畢爾包今場雖然亦都有中場伊度拉斯比同中堅拿樸迪停賽，而守將伊拉奧拿亦因傷缺陣，不過影響肯定比馬體會冇咗文迪蘇傑同佐治高基低，球隊近四次主場對住馬體會有三場係開出半場和，今場主場出戰，至少上半場有力同馬體會周旋，半場和值捧。