史雲斯飛數夠硬淨

猪拉多纳

肥叔先喺度祝大家「拆禮物日」快樂，希望各位開心「拆禮物」！由於歐洲其他聯賽進入歇冬期，無論大戶定散戶都會聚焦英超，呢段時間猶如獨市生意，差唔多隔一日就有比賽，自然大把人玩，預計投X額會節節上升。同上年幾隊輪流坐莊嘅激烈情況有別，現時英超係「雙藍」爭霸格局，曼聯雖然早前回勇連場報捷，但仍被車仔同曼城甩開，快車期正係搶分關鍵時刻，紅魔能否趁機收窄同「雙藍」距離，值得留意。
天鵝主場特別醒

講番今日重心推介，史雲斯主場對阿士東維拉，儘管維拉前鋒艾邦拉荷打甩咗上輪對曼聯嗰張紅牌，今仗可以披甲，不過「天鵝」今季聯賽主場出擊，只曾輸過兩次，呢班波喺自己地頭比賽特別Sharp醒，初盤讓到半一咁多，睇飛數暫時都幾硬淨，上盤有買趁早。（now 632周五晚11時直播）至於早場有倫敦打吡車路士主場對韋斯咸，「錘仔幫」話晒都係前四分子，今季演出可人，車仔要讓到球半咁辣，肥叔認為唔多值博，今場轉玩大盤好過。