今晚等睇入球騷

猪拉多纳

當喪攻熱刺遇上弗爆紅魔

話咁快英超快車今晚就開到第2站，亦係各隊2014年嘅「收爐戰」，論吸引程度首選梗係熱刺主場火併曼聯。「紅魔鬼」前線粒粒皆星，攻力強橫，聖誕快車首站3比1輕取紐卡素，成為首支「拆禮物日」累積50勝嘅球隊。不過熱刺都唔失禮，前鋒哈利卡尼今季大爆發，大家可以剝定花生等睇「大」騷嘞！

（now 621周日晚8時直播）
哈利卡尼入波保證

熱刺一向嘅踢波風格就係進攻，季前換帥都要搵嚟唔鍾意玩守勢足球嘅普捷天奴執教，佢哋無論對住曼城、車路士等勁旅，都會保持傳統，同對手鬥攻到底，咁亦係點解熱刺成日畀人大炒，例如上季分別畀利物浦同曼城大數5至6蛋，今季就輸畀曼城1比4，以及不敵車仔0比3。熱刺前晚2比1擊敗李斯特城，已連開4口大，科娜相信主場出擊嘅熱刺冇理由唔同紅魔搏錘。

始終熱刺都有一定攻擊力，喺蘇爾達杜同艾迪巴約齊齊冇帶射門鞋嘅情況下，好彩有21歲射手哈利卡尼及時彈出，呢位「哈利仔」近排頻頻入波，表現勁Sharp醒，上仗開波1分鐘即建功，連續4場入波，風頭簡直勁過正牌「哈利仔」呀！有佢同基斯甸艾歷臣、拉美拿等攻擊球員拍住上，要攻破防守麻麻嘅曼聯大門一啲都唔難。
近季對陣旺開大盤

曼聯踢法一樣係主攻，前面有朗尼、尹佩斯等人，唔驚入唔到波，二人上仗包辦3個入波，朗尼仲梅開二度添！後面雖然有個神龍迪基亞，但紅魔條後防線始終畀唔到人信心，菲爾鍾斯、莊尼伊雲斯等人都唔係頂級中堅，病咗嘅防中費蘭尼今場又唔知出唔出到，咁搞法你叫迪基亞神救得幾多次？連史篤城、阿士東維拉都入到曼聯波，熱刺當然更有把握。

而且睇番往績，兩軍近幾季對戰經常開大，包括上季熱刺喺主場同曼聯打和2比2，仲有12至13年球季，熱刺作客以3比2擊敗曼聯，23年嚟首次喺奧脫福球場贏波，統統都係令人難忘嘅經典賽事，今場不妨再追多次入球大！
曼市雙雄收爐戰多士哥

2012年 諾域治3:4曼城

2011年 曼聯2:3布力般流浪

2010年 曼城4:0阿士東維拉

2009年 曼聯5:0韋根