「海鷗」飛唔起博富咸主W冇死

猪拉多纳

白禮頓連續兩季衝英超失敗後，今季竟然衰到淪為護級球隊，家陣排喺聯賽榜尾二。雖然教頭希比亞早前引咎辭職，為差劣戰績負責，弊在班波依然冇起色，今晚英冠造訪卡雲農舍球場，遇上近期鋒線交足貨嘅富咸，睇怕難逃輸波命運，1.98倍主勝咪錯過。

（開賽時間：周二凌晨4:00）

希比亞上星期辭職後，白禮頓上場「拆禮物日」快車由看守領隊鍾斯領軍，可惜無助結束近期頹勢，連續7場聯賽未嘗勝利滋味。如果齋睇作客戰績嘅話，佢哋更係連續9場未贏過，點信得過呀？
希比亞辭職 白禮頓7場不勝

再者「海鷗」條鋒線勁曳，除咗森巴鐸克繼續養傷，戴倫賓特上場踢得半個鐘仲打埋柴，今場唔使預佢踢得。至於落場機會最多嘅阿祖安哥倫加，近5場淨係入咗球12碼咁大把，加上後衞般奴沙托坐波監，就算受讓都捧唔落手。

今場擁有主場之利嘅富咸，上輪快車撞正踢到曉飛嘅「一哥」般尼茅夫，最後踢到補時至輸第二粒，表現有晒交代。而且相比「海鷗」前線啞火，富咸鋒線孖寶洛達列加同維根基斯甸臣狀態好得多，兩人近7場聯手貢獻7球，今晚要擊退白禮頓開個主W，唔難啫！