「343」噴射機轟爆墨爾本城

猪拉多纳

正所謂窮則變、變則通，開季10場不勝嘅紐卡素噴射機最近大變身，兵行險着喺主場改踢343進攻陣式，冒險得嚟又真係收到唔錯效果喎！今日佢哋喺主場迎戰不擅作客嘅墨爾本城，絕對有機會延續近期回勇之路，博2.82倍主勝開心過新年啦！（有線64、203周二下午2:00直播）
墨爾本城作客唔多掂

紐卡素噴射機教練史杜賓斯見球隊今季成績差勁，早前將用開嘅442陣式改成343，希望利用主場之利發揮球隊進攻特點，將戴夫卡尼推前同祖爾格菲斯組成左右邊鋒，為厄瓜多爾中鋒艾臣蒙達路提供彈藥，上次主場出戰就贏咗阿德萊德聯打開勝利之門，球員信心提升唔少。

作客嘅墨爾本城近期係威係勢，不過佢哋最近3場聯賽都係主場，但作客戰績就唔係好見得人，今季聯賽4場作客得1勝1和2負，作客墨爾本勝利同威靈頓鳳凰分別輸2:5同1:5，都真係幾失禮。唔好忘記墨爾本城防守主力梅度卡受傷缺陣，條防線隨時又出醜，輸波有乜出奇？記得嚟緊今明兩日球彩台都有澳職直播呀！
頂占筍盤：紐卡素噴射機（勝）