車仔元旦搶熱W

猪拉多纳

寸王狂插 球證受壓

元旦日英超快車終點站送上重量級「倫敦打吡」，熱刺主場硬撼車路士，上場作客修咸頓畀球證屈死慘跌兩分嘅車仔谷埋成肚氣，今場又要係打吡戰，成班「車手」肯定會出盡全力擊敗熱刺，科娜認為喺新一年最緊要係攞個頭彩，1.62倍客W熱啲都照捧！

（now 621周五凌晨1時30分直播）
借傳媒製造輿論

車路士有球迷組織日前搞咗個街訪，問車迷肯唔肯錫一個着住熱刺波衫嘅靚女，大部分車迷都耍手擰頭，有啲更無奈地話：「雖然我好想錫，但佢着住熱刺波衫，我就唔會咁做。」車迷見到靚女都咁好定力，就知車仔同熱刺肯定冇Friend做，雖然兩軍之間嘅敵意，唔似得阿仙奴同熱刺咁有深仇大恨，而且打吡戰對兩隊嚟講始終有特別意義，更添今場嘅大戰味道。

車仔上仗作客修咸頓被球證「吹」殘，法比加斯喺禁區內被踢低冇12碼仲要被屈插水食黃牌，最終車仔和波跌咗兩分，領隊莫連奴賽後勁躁，鬧爆英超球證針對車仔，仲話球壇有「反車行動」。「寸王」不嬲都食腦，佢咁鬧一鬧雖然可能會畀足總罰款，但卻可以向球證施壓，警告班球證吹雞嗰陣要「醒醒定定」。莫帥呢番話立即激發傳媒調查究竟球證是否「反車」，結果《每日郵報》發現車仔今季只獲兩個12碼，而且都係喺主場，比曼城同阿仙奴少2至3個。「寸王」利用傳媒嘅力量令車仔擺出受害者姿態，以博外界同情，球證為免再受插，或會作出對車仔有利嘅判決，「寸王」呢招真係高。
熱刺照秤唔夠揪

車仔掃除咗球證呢個不利因素，而且莫帥「揸車」以嚟甚少連衰兩鑊，通常都可以極速反彈，例如輸畀紐卡素後即刻喺歐聯輕取士砵亭，而且上場和得咁唔抵，一班「車手」喺今場打吡戰肯定加多兩錢肉緊，搵熱刺嚟出氣！熱刺上場畀曼聯狂攻，唔輸實有賴門將洛里斯多番神救，但今場面對攻力更強、擁有助攻王法比仔同機會主義者迪亞高哥斯達嘅車仔，實力有差距下難再保清白身，客勝雖稍熱，但新年贏錢攞意頭最緊要，一於照捧可也！