紅魔搏到殘 點攻「城」

猪拉多纳

尹戈爾唔適應衝快車

今晚最後一輪聖誕快車賽事，曼聯將作客史篤城。雖然紅魔最近連續9場不敗，不過佢哋每逢作客演出都大打折扣，加上領隊尹戈爾唔習慣咁密集嘅賽期，搞到一眾魔兵打到殘。今次佢哋作客仲要讓半一，不如撐1.7倍下盤好過。

（now621台周四晚8:45直播）
史篤城箭頭 高波地波都掂

史篤城喺呢次快車檔期入面有3場比賽都係主場出擊，嚟到最後一輪賽事體能點計都有優勢。當中前鋒馬美迪奧夫、保贊同高治最近更輪住開炮，證明佢哋打高波定地波都咁掂，加上前者今次倒戈肯定加多兩錢肉緊搏殺，計落的確有搶分本錢。

相反今晚已經係曼聯近4戰中第3場作客賽事，回唔切氣真係唔出奇。況且尹戈爾似乎唔適應快車賽程，對上2仗竟然喺48小時內連續派出11位相同球員打正選，今仗紅魔容乜易同上場鬥熱刺一樣，一到下半場即刻跌Watt走樣，就算中場安達靴里拉復出都唔幫得幾多。更何況曼聯今季作客表現麻麻，所贏2場都係靠運先砌低修咸頓、阿仙奴，呢鋪要讓波堅信唔過囉！