法足盃照搶馬賽大炒格

猪拉多纳

踏入2015年Combo King首次同大家見面，先祝各位身體健康、波盤常中。今日阿King重心放在法足盃第九圈，現排法甲榜首嘅馬賽作客鬥低組別隊伍格勒諾布爾，要淨勝兩粒過關冇難度，讓球客勝放心捧場。

（TVB 302周一凌晨3時45分直播）

法足盃參賽球隊眾多，由季初至今已進行多輪比賽，二十支法乙隊伍於第七圈加入，然後嚟到今輪第九圈再多二十支法甲球隊。今場主角之一格勒諾布爾於09至10年球季仍在法甲角逐，不過當年排聯賽榜包尾降班，及後因財政問題被重罰降落第五級別賽事，現時雖於第四級別賽事排第一，但實力已經大不如前。相反馬賽經過幾季浮浮沉沉，今季搵來阿根廷狂人比爾沙執教終於重現勁旅本色，踢完首循環聯賽能力壓里昂、聖日耳門高踞聯賽榜首絕非僥倖，射手基格納今季聯賽入球有過半數於客場取得，今場又係數胡好時機。
里昂愈戰愈勇搵朗斯報仇

另外兩場較早開波嘅直播賽事，先講一場全法甲對碰朗斯於卡拉爾斯伊保爾球場鬥里昂，朗斯季初曾於聯賽半爆冷作客贏過里昂，但當時里昂仲要分心應付歐洲賽，表現遠在水準之下。里昂自從唔使應付歐洲賽後愈戰愈勇，現時聯賽排名甚至高過擂台躉聖日耳門。朗斯現時於聯賽只比包尾大幡卡昂多四分，預料下半季要應付護級戰，盃賽未必會上心，里昂可望報回上次輸波之辱，捧客W。

（TVB 301周日晚9時15分直播）

最後法乙尼姆主場越級挑戰法甲摩納哥，尼姆位於法乙下游，實力跟摩納哥有一段距離，不過後者攻守主力貝碧托夫及卡維奴俱有傷在身，經過歇冬後狀態存疑，預計今場交收唔會多，捧細盤。

（TVB 302周日晚9時15分直播）