皇蘇主場夠巴閉

猪拉多纳

砌低過「馬德里雙雄」

今晚西甲有場大戰，皇家蘇斯達將會喺主場迎戰巴塞隆拿。皇蘇季初一直踢唔出應有水準，不過季中由「莫天才」莫耶斯領軍之後，佢哋表現確係有改善，況且佢哋今季專打老虎，主場試過砌低對「馬德里雙雄」，今晚對住巴塞，話唔埋又會炮製爆冷賽果，一於支持3.7倍嘅皇蘇「讓球主勝」。

（now632台周一凌晨4:00直播）

其實自從莫耶斯接掌皇蘇之後，班波穩定性明顯好咗，只係輸過一場波，無疑前線破關能力始終唔及上幾季，原因同阿基列斯搵唔到射門鞋有關，雖然賽前莫帥話弗爆射手卡路士韋拿，未必踢到呢場大戰，咁反而令到前鋒艾費特芬保加臣有望正選披甲，隨時同上仗有入波嘅中場簡拿利斯，擦出新火花都未定。仲有呀，皇蘇季初反勝皇馬場波，可以話係技術性擊倒，證明班波對強隊特別醒神，喺地頭對住巴塞相信亦會一樣。
近5次主場對巴塞不敗

巴塞早前被國際足協處罰，禁止喺轉會市場買賣球員，意味嚟緊1年球隊只會有出冇入。呢個負面消息，無疑對歇冬前保持10勝1和嘅巴塞帶來一定影響。雖然巴塞只得華美倫1件傷兵，但丹尼爾傷都未好晒，美斯直情前晚先歸隊，況且唔講唔知，原來皇蘇自10至11球季升番上西甲開始，巴塞近5次作客未試過擊敗皇蘇，計落都有成3年幾，皇蘇今季主場已經打低兩隻老虎（皇馬，馬體會），睇嚟今晚巴塞有難咯。