流浪者受讓咪上當

猪拉多纳

聯賽未開齋 殘兵頭耷耷

聯賽仲未開齋嘅西悉尼流浪者，今日主場迎戰墨爾本勝利，西悉尼流浪者完成亞冠盃及世冠盃後終於可以專心應付澳職戰線，可惜主力射手杜米祖歷要出戰國際賽今仗無法上陣，面對作客嘅勝利相信難望打開今季聯賽勝利之門，勝利小讓平半捧上盤。

（有線64及203台周二下午4時30分直播）

西悉尼流浪者早前因要應付亞冠盃及世冠盃，導致聯賽成績差勁，開咧至今竟未嘗一勝，只錄得四和七負。亞冠盃及世冠盃已經完結，西悉尼流浪者終於可以專心應付澳職，可惜對上兩仗仍然表現平平，今仗除前鋒辛達利比及美巴圖繼續缺陣外，主力射手杜米祖歷及後衞史柏拉洛域因要踢國際賽而無法上陣。其中杜米祖歷嘅缺陣對近四仗聯賽一球不入嘅西悉尼流浪者影響甚大，今仗就算有主場之利都未必能在對手身上取得入球。
勝利前鋒復出搏殺

墨爾本勝利近三仗錄得一勝兩負，但球隊輸嘅兩仗分別係打吡戰對墨爾本城及鬥榜首珀斯光輝，唔能夠話球隊已經無復季初之勇。

勝利今仗雖有後衞利查因累積滿黃牌要停賽，中場布洛斯咸可能要墮後填補其空缺，但有突尼西亞前鋒賓卡法拿坐完波監可以復出，相信對球隊實力影響不大，今仗作客有主力缺陣嘅西悉尼流浪者絕對有力反客為主，讓平半都照撐上盤。