流浪者主場硬淨 勝利讓波制唔過

猪拉多纳

澳職喺亞洲盃休戰前嘅最後一戰，包尾嘅西悉尼流浪者主場對爭標分子墨爾本勝利。雙方都有主力入選澳洲國家隊缺陣，牌面上固然係墨爾本勝利佔優，不過唔好睇小流浪者喺地頭嘅戰鬥力，佢哋今季只係輸過一次主場咋，「勝利」作客讓波絕對冇着數，今場一於撐1.58倍「讓主」！

（有線64、203周二下午4:30直播）
包尾流浪者簽防中應急

西悉尼流浪者貴為亞冠盃盟主，不過到依家喺澳職竟然一場都未贏過排包尾，前排去摩洛哥踢世冠盃，更有中場巴古斯負傷而回，好在最近簽入防中歷克卡爾馬應急，呢位前墨爾本城球星傳送能力同經驗都好好，應該可以好快融入流浪者嘅踢法。球會近期亦開始清理門戶，率先將紀律同狀態都有問題嘅巴西中場域陀沙巴雪藏兼掛牌，殺一儆百，睇吓其他球員仲敢唔敢懶懶閒！

話就話「流浪者」排包尾，但佢哋喺地頭出戰都有啲把握o架，今季聯賽5場主場只輸過1次，其他4場都和波收場，踢亞冠盃嗰3場主場更全部贏晒，足見喺地頭有頑強戰鬥力。西悉尼流浪者今場有後防史柏拉洛域同前鋒杜米祖歷畀澳洲國家隊徵召，但對方墨爾本勝利亦有隊長、中場球員米利根被召喚，況且「勝利」經歷過季初強勢後，近3場聯賽已經輸咗2場，狀態跌緊Watt，試問今場邊讓得起？
頂占筍盤：西悉尼流浪者（讓球主勝）