愛華頓主W扑錘

猪拉多纳

馬天尼斯為咗份工必搏

今晚英總第3圈有場英超戲碼上演，由愛華頓主場撼韋斯咸。「拖肥糖」近況頹到爆，領隊馬天尼斯嘅前途更盛傳亮起紅燈，不過「錘仔幫」亦唔好得去邊，兩大進攻猛將迪亞法沙高同高耶迪去咗備戰非國盃，火力大減，一於撐愛華頓反彈，1.88倍主W抵玩！

（now621、633及660台周三凌晨3:45直播）

「拖肥糖」上季喺馬天尼斯帶領下，踢得有聲有色，以第5完成賽季，差啲就踢到歐聯，馬天尼斯仲因為咁而得到5年新約添。可惜班波今季表現無以為繼，跟同市死敵利物浦一齊沉淪，近期仲遭逢4連敗，聯賽排名跌到中下游位置。英國《每日電訊報》日前爆料，話愛華頓高層已經對馬天尼斯失去耐性，今場再有咩三長兩短的話，佢嘅帥位就真係危危乎啦。
兩大猛將踢非國盃 韋斯咸鋒力疲弱

好在愛華頓今場除咗後防重臣艾卡拉斯停賽之外，其他球員都可以候命。之不過，「錘仔幫」主帥艾拿戴斯就要為陣容而頭痛嘞，事關射手迪亞法沙高同中場發電機高耶迪，因為要代表塞內加爾出戰非國盃，已經離開咗英國，今仗無緣披甲，後衞湯堅斯又傷咗足踝，「錘仔幫」戰鬥力大減，愛華頓今次仲唔發圍等幾時？