馬體會主場必勝

猪拉多纳

「雜種」施蒙尼 皇馬剋星

西班牙盃16強首回合繼續上演，馬德里體育會喺主場對皇家馬德里，值得玩1.72倍「讓球主勝」。因為被球迷形容係「雜種」（Cholo）嘅馬體會教練施蒙尼，簡直係皇馬剋星，有佢領軍絕對唔易輸，加上皇馬連勝走勢結束被打窒，隨時又出事，作客讓波捧唔過。

（now632台及TVB13周四凌晨4:00直播）

由2013年西班牙決賽計起，馬體會近9次同皇馬碰頭，90分鐘計拎到3勝4和2負，證明馬體會教練施蒙尼嘅唔要命鐵血戰術，食得住皇馬嘅技術型打法。今季馬體會係西超盃兩回合計以2:1砌低皇馬，季初喺聯賽首循環作客以2:1贏波，證明絕對唔係符碌，有施蒙尼就有得威！
馬體會近9次交手僅2敗

事實上，施蒙尼被南美球迷嗌「雜種」（Cholo）幾乎20年，不過呢個字近年喺歐洲成為潮語，並冇貶義，馬體會球迷仲習慣高舉Cholo紙牌撐佢添。最近施蒙尼話好需要主場球迷，嗌佢哋落力啲打氣，激發馬體會嘅主場威力，就算未知回歸嘅費蘭度托利斯踢得未，都值得撐多次施蒙尼。
皇馬連勝斷纜 拉莫斯有傷

皇馬喺杜拜挑戰盃慘負AC米蘭後，日前喺聯賽作客以1:2不敵華倫西亞，22連勝走勢正式斷纜。加上皇馬啲球星放完假後，狀態似乎幾曳，當中賓施馬更加被傳媒喪插夢遊球場。另外，沙治奧拉莫斯被迫帶傷踢足全場，同樣靠唔住，遇正同市死對頭馬體會嘅超破壞式打法，要贏唔易。
Data King：皇馬半場14連勝

‧馬體會連續8場開半場入球細。

‧馬體會連續11場主場上半場冇失波。

‧皇馬連續14場正式賽事半場領先。

‧皇馬前鋒C朗以26球領先西甲射手榜。
乜都玩錦囊：馬體會半場穩陣旺開細

馬體會近年對皇馬踢得特別落力，特別係上半場球員夠氣夠力，好少會失波，對上4次交手上半場只失過1球。既然馬體會已經連續8場開半場細，又連續11場主場上半場不失，就博埋1.43倍半場細啦！
盤路解碼

馬體會近7場「讓球主客和」4次開「讓球勝」。