雙藍爭霸寸步不讓博影相

猪拉多纳

英超榜首車路士、曼城喺聯賽榜已經放甩晒其他球隊，今季錦標幾乎已成「雙藍爭霸」格局。打完20輪後出現咗兩隊勝和負、得失球、積分全部數據相同嘅罕見形勢，因此去到季尾難保唔會好似賽馬咁要「影相」分高低。兩支藍軍今夜分途出擊，唔止寸步不讓一定要贏，仲要力求盡數，希望打完呢場至少贏住對手一個馬鼻，獨享一哥之位。
車仔叉足電炒紐復仇

車路士連續兩輪英超作客失分後，返到史丹福橋主場，遇上甩頭甩髻嘅「喜鵲」紐卡素，絕對係爭取大捷嘅止血良機！紐卡素領隊柏杜被水晶宮撬走，首席射手柏比斯施斯繼續停賽，可以話係支離破碎。車仔首循環被「喜鵲」打破不敗身，今次仲唔有仇報仇炒鑊甘咩？即使讓到兩球都要捧讓球主勝。

（now 622周六晚11時直播）
紐卡素新帥唔夠班

車仔聖誕快車後兩場連續作客兩舊「豬頭骨」修咸頓同熱刺，1和1負失咗5分，打窒咗道氣。不過車仔人腳充裕，領隊莫連奴擅長激勵球員克服逆境，加上有場足總盃畀佢哋喘息，車仔該仗派出副選仍大炒屈福特3比0。夏薩特、尼曼查馬迪、法比加斯、泰利等主力獲得輪休下，已經回晒氣，今仗叉足電出擊，應該有望報番首循環金身被破之辱。

紐卡素話就話率先打破「藍戰士」今季不敗之身，但依家佢哋銳勢全失，自上月初贏車仔後，近7仗僅1勝1和5負，包括剛喺足總盃被英超包尾嘅李斯特城淘汰，可見看守領隊約翰卡華根本未夠班領軍。最慘仲係首席射手柏比斯施斯仲要坐「波監」，加埋中場迪奧迪離隊備戰非國盃，恐怕「喜鵲」只能任由對手魚肉。