沙特上盤撐得過！

猪拉多纳

40度高溫煎熟國足

今日亞洲盃分組賽壓軸戰，當然係於澳洲布里斯班舉行嘅B組賽事沙特阿拉伯對中國，雖然國足嘅世界排名比沙特更高，但近18年對住呢支西亞勁旅未贏過，都咪話唔邪，而且澳洲近40度嘅高溫，勢必令國足球員難以適應，加上執法球證乃「中國剋星」，沙特小讓平半真係要趁早捧場！

（now 672周六下午5時直播）

自從04年以東道主身份奪亞軍後，中國於對上兩屆亞洲盃均喺分組賽出局，令人失望。今屆中國由前里昂教頭比連領軍，近八戰未嘗一敗，但要留意全屬無關痛癢嘅熱身賽。比連形容中國係「沉睡巨人」，仲話武磊今個賽事爆紅，呢位新星既能策動組織，埋門亦冷靜，不過雙拳難敵四手，勢必畀對手盯實，若果佢被凍結的話，隨時令國足進攻陷於癱瘓。
遇「剋星判官」冇運行

雖然沙特阿拉伯今非昔比，世界排名跌出百大至102位，比中國嘅96位仲低，但佢哋近18年對親中國都未嘗一敗，包括喺亞洲盃決賽周史上4度交鋒，取得3勝1和嘅佳績，絕對喺格食格。而且澳洲接近40度高溫，國足好難頂得順，相反對沙特嚟講勁易適應，加上今仗嘅伊朗球證法加尼，之前10次執法有關中國（包括球會級及國際賽）球隊有份參加嘅賽事，中國球隊只得1勝4和5負嘅劣績，堪稱「中國剋星」，沙特小讓平半值得捧場。