水晶宮難頂熱刺

猪拉多纳

新帥柏杜唔係神仙

好多朋友喺賭波嗰陣，特別留意「新帥效應」，覺得一支球隊處於谷底決定易帥，在新教頭領軍下總會有一番新景象，至少會有一段成績反彈嘅「蜜月期」。不過，肥叔覺得都要睇嗰位領隊係乜嘢料，好似英超弱旅水晶宮有新帥柏杜接手，今晚喺主場迎戰熱刺，但呢班波立立亂唔多信得過。

（now 621周日凌晨1時30分直播）

水晶宮本身實力就係「有限公司」，如果唔係上季中途搵咗「護級專家」佩尼斯掌舵，早就降班收場喇。上年夏天佩尼斯因為買人問題，同高層意見不合嬲到劈炮，臨急臨忙搵嚟前昆士柏流浪領隊禾諾克接手，但呢位「升班專家」層次確係差一皮，明知自己班波質素一般，都唔先搞好防守，仲成日呻冇前鋒用，兩頭唔到岸教咗半季就食「豉椒炒魷」。
盃賽贏多佛不足為據

如今水晶宮焗住要賠錢撬走紐卡素主帥柏杜嚟教，當初高層草率地放走佩尼斯，蹉跎半季付出淪為尾三嘅代價，又未必科水買人，你當柏杜係神仙咩？肥叔暫時對水晶宮前景唔多睇好。雖然柏杜於上周英格蘭足總盃開咗個靚頭，但所贏對手只屬非聯賽球隊多佛，不足為據，今晚英超返主場火併熱刺，後者小讓平半低水，飛數硬淨，肥叔寧願捧番上盤。
佩尼斯有料西布朗信得過

至於另一支啱啱易帥嘅英超球隊西布朗，正正係搵咗佩尼斯嚟救亡，佩帥有幾多料上季有目共睹，今晚佢哋坐鎮主場對護級勁敵侯城，為搶分兼拉埋「老虎」落水，同樣小讓平半低水，呢個上盤真係有買趁早。

（now 624周六晚11時直播）