奧斯爾基奧特齊復出 阿仙奴打爆史篤城

猪拉多纳

同晚早場英超阿仙奴坐鎮主場迎戰史篤城，養傷3個月嘅「大眼仔」奧斯爾、兩大中場艾朗藍斯同法米尼都已康復，加埋箭頭基奧特坐完波監，4大主力齊齊復出，威力非同小可。加上近年喺酋長主場往績食住史篤城，應可報番上月作客輸波之仇，斯維力撐讓球主勝。

(now 621周日晚9時30分直播)

雖然剛被借到國米嘅德國國腳普多斯基，炮轟阿仙奴領隊雲格唔畀機會佢之餘，連走都唔講聲拜拜，極唔尊重佢，但其同胞奧斯爾則為「教授」帶嚟喜訊，呢位因膝頭韌帶受傷抖咗3個月嘅中場大將，喺twitter上載一張同球衣管理員維克嘅合照，仲留言:「維克，唔好唔記得周日將我件波衫掛喺更衣室喎！」隨後雲格亦稱「大眼仔」非常餓波，仲話會派出最好嘅球員上陣，預計佢今仗出場機會極高。

除奧斯爾外，隊友法米尼同艾朗藍斯已經好番，大大提升中場嘅攻守能力，而喺聖誕快車期對昆士柏流浪衝動領紅牌嘅箭頭基奧特，坐咗3場波監後亦會復出，後面有「大眼仔」同藍斯支援，「基佬」同阿歷斯山齊士仲唔大把機會數胡咩？
作客酋長球場冇運行

儘管史篤城上月聯賽贏過阿仙奴，但佢哋到訪酋長球場往績認真唔掂，近6次作客全敗，當中4次輸兩粒或以上，更何況佢哋仲有迪奧拿坦泰斯拿、域陀摩西斯、薛維爾及奧丹維治等養傷，馬美迪奧夫要出戰非國盃缺陣，前鋒保贊要待賽前體測先知能否披甲，咁多不利因素下根本捧唔落手，相信阿仙奴可輕取史篤城一雪前恥，直取讓球主勝。