日本炒起巴勒斯坦

猪拉多纳

世盃失敗尋求救贖

衞冕盟主強勢登場！亞洲盃今午上演最後兩場首輪分組賽，頭場Ｄ組日本撲擊首度參賽嘅巴勒斯坦，日本對今屆賽事空前認真，新帥艾古爾擺出433強攻陣式，矢志喺首仗大炒弱旅立威，讓球主客和日本「-2」照捧。

（now 671周一下午3時直播）

日本向來自視高心頭高，放眼世界，除咗世界盃外圍賽，經常用一般亞洲區賽事嚟鍛煉新人，甚至亞洲盃都唔例外。不過，隨住去年夏天滿懷希望下喺巴西世盃慘敗而回，令國民十分失望，今屆賽事作戰心態有變，對衞冕志在必得，希望以冠軍撫慰球迷，新帥艾古爾亦急於立功，經過連番試驗，佢決心採用433強攻陣式，香川真司負責中場派牌，本田圭佑移前任右邊鋒，左路則起用喺FC東京爆紅嘅小將武藤嘉紀，而喺德甲踢到曉飛嘅岡崎慎司就踢番最擅長嘅正中鋒，呢個強攻組合喺熱身賽狂勝洪都拉斯同力壓澳洲都顯示非凡威力。

巴勒斯坦近一年進步神速，世界排名由原來嘅165位狂升到115位，喺去年五月嘅亞洲足協挑戰盃以零失球佳績獲得冠軍，首次攞到亞洲盃決賽周資格，佢哋近期亦愈踢愈進步，贏過印度、巴基斯坦同越南，面對沙特同烏茲別克都係僅敗，上月底作客中國仲守和0比0，證明唔係冇骨魚腩，不過今日初登大場面就遇上最強嘅日本，淨係輸經驗都輸死。不過大家要留意佢哋表現，因為踢完呢場對日本，跟住兩場對約旦同伊拉克未必冇得砌！
約旦伊拉克細盤冇肉食

至於尾場約旦對伊拉克，兩軍人腳實力接近，近況同樣好沉，同處於重建階段，今仗預期入波唔會多，但細盤熱到得1.38倍棄不足惜，不如蹺埋雙手睇吓佢哋踢成點先算啦！

（now 671周一下午5時直播）