史雲頓前鋒惡客 反轉高雲地利

猪拉多纳

轉會窗喺今個月重開，唔少球隊都會買人增強實力同清洗部分冗員，一旦管理層處理球員去留問題做得唔好，隨時會搞到好似英甲嘅高雲地利咁，大大打擊軍心！今晚佢哋喺主場迎戰史雲頓，就算受讓平半都要唔過，撐上盤。

（TVB301台周二凌晨3:45直播）
高地執陣執到亂龍

高雲地利最近簽入借將前鋒法蘭克洛保同守將艾朗馬田，尚算正路，但奇就奇在季初加盟、愈夾愈好兼喺上仗建功嘅前鋒托基，就突然被球會放棄。呢位前鋒躁爆咁話諗唔明球會點解咁做，仲發晦氣指既然留喺度都冇前途，倒不如走人。另一件射手加利麥甸尼就續借到今個月尾咁大把，擺明當人水泡，等有新兵嚟到之後就趕人扯，咁冇人情味，難怪呢班波士氣咁低落啦！

相反，史雲頓就以不變應萬變，雖然澳洲中場盧安高同伊拉克國腳耶沙卡斯米去咗踢亞洲盃，好在射手安迪威廉斯弗到震，最重要係呢位前鋒客戰零舍醒神，連續4場作客有波入，有佢幫手，足夠射爆軍心不穩嘅高雲地利啦！