薩斯索羅硬淨再嗒A米

猪拉多纳

周中意大利盃上演16強，當中ＡＣ米蘭主場對薩斯索羅，兩隊啱啱喺月初聯賽交手，薩斯索羅反客為主爆冷贏2比1，有辦畀大家睇，今晚再次喺同一地點對壘，薩斯索羅未驚過。薩軍前鋒施蒙尼沙薩更係ＡＣ剋星，近兩次對「紅黑兵團」都有波入，今仗隨時又有斬獲。以ＡＣ米蘭現時頹勢讓唔起薩斯索羅，要讓球客勝。

（now 633、660及TVB 13周三凌晨4時直播）
主隊放完假仲未回魂

ＡＣ球員放完聖誕新年假期後表現仲差，踏入今年兩場聯賽僅得1和1負，明顯未操起狀態。球隊後防唔掂已經唔使多講，依家連進攻都死晒火，上仗對住拖連奴只係靠博到12碼先至入到波。同埋ＡＣ現時一心爭下屆歐聯入場券，對本土盃賽興趣唔大，更令人懷疑佢哋爭勝嘅決心。

薩斯索羅今季表現令人驚喜，近13仗僅1敗，非常硬淨，前鋒施蒙尼沙薩弗到漏油，近5仗射入5球，包括上次作客ＡＣ射入反勝1球。薩斯索羅屬於細球會，想攞威最好喺盃賽埋手，意大利盃成為佢哋發圍最佳地方，戰意可靠下受讓博得過。