國足報仇吐烏氣

猪拉多纳

黃曉明都讚係Super Hero！

亞洲盃B組首名爭奪戰展開，中國喺布里斯班對世仇烏茲別克，受讓平半抵追。國足首戰砌低沙特阿拉伯後贏番尊嚴，除咗掀起澳洲華人嘅撲飛潮，就連靚仔藝人黃曉明都喺微博激讚，你點可以唔撐呀？

（now671台周三下午5:00直播）

中國以1:0打沉沙特，我最欣賞嘅唔係王大雷救出12碼，或者于海射入致勝罰球，而係名氣唔大嘅教頭比連，夠膽「瓦解」恒大勢力，恒大球員中只得鄭智、張琳芃同梅方正選出戰沙特，比起近年國足盲目依賴恒大班底，全隊更有凝聚力，認真抵讚。
放假鬆鬆 買奶粉iPhone

仲有呀，國足贏波後安排球員放半日假，唔少國腳去咗買奶粉同iPhone 6，放鬆心情叉電，要知道國足10次出席亞洲盃決賽周，3次首戰贏波得1次成功出線，對上兩屆都喺分組賽出局，而且巧合地都係最後1場分組賽衰喺烏茲別克手上玩完，今場對住仇家實搏。

國足新氣象幾乎全民喪讚，仲有好多名人明星加入畀Like，當中「曉明哥哥」就話：「中國隊不是『快男』，你們是超級英雄！」另外，墨爾本嘅30萬華人已發起搶飛潮，等待國足殺入8強去墨爾本比賽，相信今場都會有近15,000球迷入場，孫可養傷只係小事。

烏茲別克首戰以1:0擊敗北韓，今場再贏就好大機會首名出線，陣中最出名當然係兩次當選亞洲足球先生嘅隊長迪積柏洛夫，可惜以往嘅食胡射手沙斯基克同格恩里克已經冇入選，就算近14年未試過喺正式比賽輸畀國足，戰鬥力都唔值得睇太高。
亞洲盃賽制

現為分組賽階段，16隊分4組，每組4隊進行單循環比賽，每組首名及次名晉級8強。