金球C朗孭起鋒線 馬德里打吡做大Show

猪拉多纳

落後兩球焗攻

今晚西班牙盃16強次回合重頭戲，皇馬同馬體會決戰巴拿貝球場，合演今季第5次「馬德里打吡」。「銀河艦隊」首回合作客淨吞兩蛋，今場絕地反擊爭出線，早兩日冧莊金球獎嘅C朗，勢必使出渾身解數爭士哥。可惜佢哋今季畀「床單軍團」食到應，打吡1場都未贏過仲要場場失波，今場主勝唔多穩陣，捧1.75倍入球大仲划算。

（now632台周五凌晨3:00直播）

皇馬踏入2015年經歷兩連敗，直到上輪西甲終於撻番着，大勝愛斯賓奴取得新年開門紅。連同呢場勝仗在內，「銀河艦隊」喺各項賽事近11戰主場狂轟41球，都咪話唔誇張。包辦當中15球嘅C朗，雖然首回合後備落場冇料到，但預計今場擔正搏殺嘅佢，早兩日先喺蘇黎世擊敗美斯、紐亞冧莊金球獎，今晚返到巴拿貝面對數以萬計嘅「艦迷」，點可以冇入波咁失威呀？
皇馬對賽場場失波

除咗有出爐金球獎得主C朗孭起條鋒線，皇馬中後場亦唔輸蝕，卻奧斯同沙治奧拉莫斯齊齊入選FIFA年度最佳陣容，前者能傳善射，喺中場獨挑大樑，拉莫斯亦不時把握角球機會後上入波，加埋法國射手賓施馬同快翼加里夫巴利壓陣，今場要喺主場攻破馬體會大門，相信難度唔大。

可惜嘅係皇馬火力係夠晒猛，但都唔代表夠贏，睇番「銀河艦隊」今季4度與馬體會合演「馬德里打吡」，除咗西超盃首回合和過1場，最近3場全部輸晒，4場夾埋失咗6球畀「床單軍團」，今場焗攻防線難免出現漏洞，文迪蘇傑、基沙文等馬體會鋒將，大有機會延續馬體會今季例破皇馬大門嘅「優良傳統」，兩隊要湊夠入3粒話咁易啦！
Data King：馬體會旺半場、角球細

‧馬德里體育會近10仗開出9次「半場細」。

‧雙方近6次會師巴拿貝球場，開出4單2雙。

‧馬體里體育會近14場開出11次「角球細」。
盤路解碼

上屆西盃16強次回合冇出現和波，主、客勝各開4次。

首回合：皇客負0:2