狀態下滑冇優細 曼聯炒唔起QPR！

猪拉多纳

紅魔鬼上仗鬥修咸頓，全場10次攻門竟錄得零中龍，狀態明顯向下。加上射手尹佩斯有傷勢難披甲，另一前鋒法卡奧疑因同領隊尹戈爾反面，估計會繼續被棄用，今仗惟有將朗尼推番上前掛帥，今晚作客鬥昆士柏流浪（QPR）優勢唔太大，預料曼聯頂多小勝，但1.48倍客W高風險低回報，寧願揀2.02倍嘅入球細。

（now 622周六晚11時直播）

曼聯去年十一月至十二月中連贏6場，但由聖誕快車起卻頻頻失分，聯賽作客3連和，上仗主場仲不敵修咸頓，講到尾係鋒線表現差。尹戈爾近期安排朗尼踢中場指揮官，反而將迪馬利亞推前夥拍尹佩斯攻堅，前者傷愈冇耐，狀態麻麻，後者今季腳風一直唔順，導致好多攻勢都係隔靴搔癢。尹佩斯有傷在身，朗尼又要換位踢前鋒，唔慣之餘仲會削弱中場組織力，可能得不償失。再睇埋曼聯今季10場聯賽作客僅兩勝，所以咪以為可以食硬昆士柏流浪。
昆士柏流浪加固防守

昆士柏流浪人腳級數落後紅魔鬼一大截，應會加固防守，佢哋今季主場曾打和曼城，對強隊時鬥志特別強，絕對唔會畀曼聯咁易得手。事實上，曼聯近3次作客QPR都係開細，今場細盤賠率有分頭更加值博。