寸王晒冷 客窒史雲斯

猪拉多纳

「法哥」BackUp車仔成手好牌

今季英超又係「雙藍爭霸」，「藍戰士」車路士喺聖誕快車期間連環失手，畀來勢洶洶嘅曼城追到氣咳，搞到領隊莫連奴心煩意亂扯晒火，車仔班身經百戰嘅球星梗係唔敢怠慢啦，今晚佢哋造訪冇咗王牌射手邦尼嘅史雲斯，論實力同人腳，有「狂牛法哥」法比加斯同迪亞高哥斯達嘅車仔，何止高一班波先，「寸王」落柯打晒冷，2.05倍「客客」，幾大都跟啦！

早前「寸王」莫連奴話覺得外界傳媒成日寫衰車仔球員「插水」，搞到球證係咁針對車仔，影響判斷及執法，莫帥仲話全英搞緊個「反車行動」添，乜理據都冇一味齋講，結果梗係被英足總檢控啦！上場車路士對紐卡素，莫連奴連賽前同賽後記者會都係No Show，實行搞無聲抗議，班球員見莫帥咁火滾，卒之喺上星期就贏紐卡素2:0氹番「老細」。
法比復出有貨交 迪哥4仗入3球

查實「寸王」手上真係有唔少「靚牌」，中場奧斯卡杜斯山度士同韋利安固然弗爆，上場對紐卡素又有「士哥」又有助攻，勁！不過講到最勁嘅，當然係英超射手榜1哥迪亞高哥斯達，同埋佢位好拍檔法比加斯啦！「迪哥」近4場聯賽合共射入3球，腳風超順，「法比仔」都唔弱，上仗傷愈復出冇乜走樣，經過一個禮拜時間谷番起狀態，相信佢會交得番受傷前嘅水準嘅！話晒莫連奴依家谷埋一肚火，今晚係時候晒冷大爆發喇！
「天鵝」邦尼投城 冇人識入波

另邊廂，主隊史雲斯就大鑊喇，主力射手韋菲特邦尼除咗話去咗征戰非國盃，即使歸隊後亦已落實由史雲斯過檔曼城，冇咗呢位今季上陣22場入9球嘅多產射手，領隊蒙克真係相當頭痛，冇晒鋒力，「天鵝」仲有咩本錢去偷雞先？

唔單止咁呀，史雲斯今晚條中場線仲要天殘地缺，奇成庸、舒維爾同謝法臣蒙迪路打晒柴，面對「一哥」車路士嘅黃金中場，「天鵝」睇怕都凶多吉少，睇埋車路士今季9次作客贏波，當中有7次都係由頭贏到尾，信「藍戰士」的話，不妨直取2.05倍半全場「客客」啦！
乜都玩錦囊：史雲斯殘陣隨時大敗

史雲斯中場勁唔齊腳，奇成庸、舒維爾同謝法臣蒙迪路全部唔踢得，主力前鋒韋菲特邦尼又畀曼城撬走，今場真係唔知憑乜搶分。相反車仔件「迪哥」近4次聯賽3場有進帳，證明英超密集賽程完全難佢唔到，加上「藍戰士」射門中框率英超最高，「天鵝」門將法比安斯基邊救得咁多球，撐埋2.38倍讓客。
Data King：車仔中框率冠英超

‧史雲斯近7次喺英超同車路士交手，僅得2和5負。

‧藍戰士得1場食白果，中框率達50.4%為英超最高。

‧車仔今季一共令6位敵方球員領紅。
盤路解碼

車路士今季聯賽8次半場領先對手。