撐曼城爆廠追車

猪拉多纳

「阿古獸」餓波發茅搶士哥

今輪英超重頭戲，梗係「二哥」曼城主場火併阿仙奴啦！「藍月亮」王牌阿古路同隊長高柏尼傷愈復出，攻守能力恢復完整，撞正阿仙奴鬧緊兵荒，點擋得住堅餓波嘅「阿古獸」呢？曼城為追趕榜首車路士，主場出擊一分都不能少，1.72倍主勝千祈咪錯過。

(now 621周一凌晨零時直播)
高柏尼及時復出

曼城早輪冇晒前鋒，阿古路、迪斯高、祖維迪及小將普素先後傷埋，主帥比歷連尼焗住要搵中場占士米拿客串掛帥，雖然效果唔錯，但畢竟只係權宜之計，而事實上之前幾場亦贏得好險，因此當阿古路好番冇耐，比帥急不及待將佢放喺後備席候命，上仗對愛華頓更後備入替，希望盡快操弗番佢。

阿古路一向都係曼城王牌殺手，入波好似食生菜咁易，佢今季聯賽只係踢咗16場波就入咗14粒，入球率非常驚人。勁餓波嘅「阿古獸」經過一周調整，相信已經逐漸上力，今仗肯定搏甩髀搶胡食，加上隊長兼中堅高柏尼同告傷愈，「藍月亮」一攻一守都有所補強，總算彌補到有咗因征戰非國盃暫時離隊嘅耶耶托尼嘅損失。
阿仙奴防線唔掂

另一邊廂，阿仙奴雖有中場奧斯爾、艾朗藍斯及法米尼等好番，但奧斯爾復出反令弗爆嘅辛迪卡索拉退居邊路，隨時影響進攻組織。上仗大炒史篤城之役，阿仙奴先有右閘迪保治右肩甩骹離場，左閘蒙利爾又撞到頭破血流，前者肯定缺陣，後者亦上陣成疑，連同隊長阿迪達、韋舒亞及韋碧克一班傷將，領隊雲格排陣難免左支右絀，預計上仗抱恙嘅哥林張伯斯今晚都要頂硬上串演右閘，呢位新紮師兄不嬲冇速度，勢必成為曼城重點打擊目標。

況且雲格固執到暈，其重攻輕守嘅踢法常令防線弱點表露無遺，上季作客曼城就輸過3比6，可謂有辦你睇。「藍月亮」上仗被愛華頓逼和痛失兩分，為追趕榜首車路士必定搏甩髀，面對後防脆弱嘅阿仙奴，又係「阿古獸」數胡嘅好時機，曼城主勝有買趁早。