西甲巨頭搶分戰3連發

猪拉多纳

西甲「超級星期日」，三巨頭皇家馬德里、巴塞隆拿、馬德里體育會分途出擊搶分爭標，好戲連場！榜首皇馬踢完西班牙盃「馬德里大打吡」，今晚早場出戰「小打吡」作客基達菲。雖然皇馬衞冕西盃失敗，但又唔使太灰，球隊始終有級數，最重要係佢哋上季囊括歐聯及西盃兩大盃賽後，今季更着意重奪聯賽冠軍，肯定搏命，對住「細佬」基達菲應該食硬冇黐牙，直取讓球客勝。

（now 632周日晚7時直播）
皇馬晒冷打爆基

皇馬歇冬之後成績冇上半季咁亮麗，主因係近期賽程連場硬仗，包括聯賽作客前列分子華倫西亞，以及西盃兩戰勁敵馬體會，遇到阻滯情有可原。其實「銀河艦隊」整體演出唔曳，強橫攻力依然，尤其係C朗仍然弗爆上仗又有「士哥」，以基達菲嘅防線絕對抵擋唔住呢位新鮮出爐嘅國際足協金球獎得主。

值得留意，教練安察洛堤近期部署，反映今季擺放更大力量爭聯賽錦標，最明顯例子係西盃首回合半力出擊對馬體會，輸壞個頭成為出局主因。既然已經「如願」被淘汰，加上歐聯未開始，今個月可以全力踢好西甲，效果應該會好理想。唯一隱憂係中堅比比因傷倦勤，但基達菲實力有限，難以威脅皇馬大門。
基達菲對賽輸咗9成

基達菲只屬細球會，以往經常向皇馬借人，雙方關係良好，中場主力柏度李安、沙拉比亞、門將哥甸拿都係前皇馬人。基達菲當正皇馬係「大佬」，唔會破壞對方好事。事實上雙方實力懸殊，近十次交鋒皇馬贏咗九次，當中七次淨贏兩球或以上，今仗讓球客勝好穩陣。