拉素平手盤明醒里

猪拉多纳

中超水準愈來愈高，廣州恒大淘寶前屆更稱霸亞冠，可惜中國國家隊近年戰績差強人意，以往肥叔見親國足都怕怕，無論讓波定受讓都估佢唔到，間中踢場好波畀啲希望你，轉頭就跣到你攤攤腰。國足於今屆亞洲盃頭兩場贏晒，令人刮目相看，但正所謂「希望愈大，失望愈大」，畢竟國足今屆分組賽抽到好籤，避開晒日本、南韓、澳洲等強隊，成績有起色絕不出奇。今日晏晝國足喺分組賽尾輪對住北韓，由於佢哋已經篤定出線，慎防搭定個靚棚等你落疊，肥叔寧願睇波算數。

言歸正傳，今晚重心場次係意甲拉素主場對拿玻里，雖然雙方實力不相伯仲，但拉素不嬲喺自己地頭踢高一皮，而拿玻里今季後防經常輸大意波，作客演出又極度飄忽，「藍鷹」挾住近八仗正式賽事不敗氣勢，唔使讓波有平手盤筍到暈，真係有買趁早。

（TVB 301周日晚7時30分直播）
曼城飛數硬淨可吼

至於英超大戰曼城對阿仙奴，「藍月亮」讓到半一咁辣，不過飛數硬淨睇嚟有計，除咗上盤外可吼埋大盤。

最後西甲拉科魯尼亞主場對巴塞，「地上最強」喺國內賽事無疑大超班，但因此令開盤嗰陣往往讓到離晒譜，好似今仗要讓到2/2.5球咁多，純粹係名牌效應，肥叔認為佢哋隨時贏波輸盤，呢仗捧番下盤。