皇馬挽菲士大炒格

猪拉多纳

今晚西甲爆發「馬德里打吡」，由皇家馬德里造訪基達菲。「銀河艦隊」啱啱喺西盃被馬德里體育會踢咗出局，出爐金球獎得主C朗拿度賽後要向球迷道歉，你話今晚點可以唔做番齣好戲先？以C朗、賓施馬同加里夫巴利嘅卡士，相信基達菲條防線都好難頂得順，捧1.54倍「讓客」。

（now632台周日晚7:00直播）

據《馬卡報》所講，皇馬會方賽前發現有球迷組織喺網上策劃唔尋常活動，於是即刻提供資料畀反暴委員會，今場打吡亦已被列為「高危賽事」。場外氣氛緊張，但張峰預計，場內戰情應該唔會太激，戰況相信會幾一面倒。
比比傷肋骨 難鬥基達菲

畢竟皇馬月頭輸完畀華倫西亞搞到連勝斷纜之後，上周中仲喺西盃被馬體會踢出局，呢啖氣唔搵基達菲出等幾時？撞傷肋骨嘅中堅比比肯定缺陣，但有C朗衝鋒陷陣乜都夠照啦！基達菲近8場聯賽全部失分，今個月對住伊巴、華歷簡奴都各失兩球，防線完全唔合格，今鋪遇上勢凶夾狼嘅「銀河艦隊」，聽炒啦！