祖記打「羅」求穩炒唔起

猪拉多纳

士別三日，真係刮目相看？繼上周中意大利盃16強後，相隔3日同一地點、同一組合又砌過，到底祖雲達斯可唔可以再炒維羅納六個一皮？筆者覺得祖記強還強，主場出擊呢3分應該無走雞，但要再炒多鑊咁大鑊嘅，相信唔係易事囉！

（TVB301周一凌晨3:45直播）

睇番上周中場意大利盃，祖記同維羅納都係出副選「應酬吓」，「斑馬兵團」有久違嘅柏比養傷38個月後復出，兩位小將羅拔圖佩雷拉、京士利高文又齊齊開齋，最Sharp醒當然係省咗兩粒嘅基奧雲高啦！

不過即使表現再好，相信佢哋返到嚟意甲都要讓路，畀一班大哥保羅普巴、泰維斯、洛蘭迪、派路、保方歸位擔正。祖記教練阿里基賽前提醒班戰將，千祈唔好畀上周中嘅大勝沖昏頭腦，祖記呢3分應該實食冇黐牙。

對家維羅納上仗畀37歲老將東尼抖一抖，預計今場會重任正選。佢同沙維奧拿嘅「高矮」進攻組合，10年前或者都仲夠照，可惜家陣佢哋夾埋已經成「7張嘢」，冇可能搏足全場。其實教練文杜連尼心知班波有幾多料，冇得同祖記鬥攻，又睇吓穩守行先嘅佢哋，可唔可以發揮好個352陣式逃過大敗啦，不過上季維羅納領先1球最終都要輸畀祖記，今場呢3分點睇都凍過水咯！