西布朗下盤要愛

猪拉多纳

黑仔把關 拖肥糖變豆腐渣

今晚英超獨腳戲愛華頓主場火併西布朗，「拖肥糖」自從由黑仔龍門祖爾盧保斯頂替受傷嘅侯活把關後未好過，上周中盃賽踢到互射12碼兼輸埋，可謂力疲心傷，個勢咁頹，撞正「新帥效應」未過嘅西布朗，愛華頓仲要讓到半一咁多，真係過晒火位，斯維力撐西布朗下盤。

（now 621周二凌晨4時直播）

一個好龍門對球隊有幾重要？不妨問吓愛華頓領隊馬天尼斯，上年「拆禮物日」對史篤城，佢哋嘅正選門將侯活因傷被換出要抖6周，改由後備龍門祖爾盧保斯頂檔後，最後一關有如「豆腐渣」般一篤即散，成績持續下滑，打咗6場未贏過之餘，仲輸咗4場，上周中足總盃重賽作客韋斯咸，愛華頓力戰下捱到互射12碼，射到第10輪成為雙方西班牙門將對決，韋斯咸嘅阿祖安卡斯迪路一針見血，相反祖爾盧保斯宴客出局收場，呢位經驗不足嘅90後門神黑到冇朋友，連累「拖肥糖」繼續沉淪。
愛華頓足總盃出局未回氣

其實嗰場波愛華頓眾將都搏甩髀，但喺中場艾登麥基迪被逐兼踢足120分鐘下，最後都飲恨出局，無論對體力及士氣都大受打擊，邊有咁快回到氣呀。除咗艾登麥基迪今仗要坐波監外，侯活、迪斯甸、占士麥卡菲等主力仍未好番，加上個勢咁頹，馬天尼斯始終冇晒計喎。

相反，西布朗自請到「護級專家」佩尼斯出山掌舵後，球隊精神面貌大為改善，連盃賽兩連捷轟8粒兼冇失波，一度被傳會賣走嘅前鋒比拉希奴更重拾射門鞋，相信「新帥效應」仲會持續一段時間，佢哋仍未走出護級漩渦，對住沉爆嘅愛華頓梗係搶分良機，有得受讓半一咁筍，呢個下盤咪錯過。