巴塞馬體會刮大鋒暴

猪拉多纳

MSN着火撞正費托翻生

西班牙盃8強巴塞隆拿對馬德里體育會點止係最強戲碼，簡直係提早上演嘅「決賽」，事關皇馬已出局，兩軍邊隊晉級，基本上已經揸住半邊盃耳，故今晚喺巴塞魯營主場作首回合交鋒，肯定額外搏命。美斯連續兩年失落金球獎，誓要化悲憤為力量，盡騷球王風範。馬體會近日同中國富豪王健林傾緊入股事宜，亦要贏波增值，加上費托翻生，隨時有神來之筆，首選入球大。

（now 632周四清晨5時直播）
失落金球 美斯誓搶盃

兩隊近年交鋒往往陷入膠着，不過巴塞早前聯賽打破僵局，以3比1擊敗馬體會，美斯、蘇亞雷斯、尼馬各入一粒，「ＭＳＮ」組合盡顯威力，可見「地上最強」已搵到破解馬體會防守戰術嘅良方。今場焦點肯定係美斯，呢位阿根廷國腳喺金球獎投票中大比數輸畀C朗後，上周西甲大炒拉科魯尼亞一役即「戴帽」示威，證明自己仍然球王，淨係呢啖氣，足以驅使佢繼續落力數胡。

巴塞上季四大皆空，令美斯選情插水，如果佢唔想再屈居C朗之下，今季必定要助球隊擸多幾隻獎盃，即使西盃亦唔可以放過。值得留意，蘇亞雷斯踢盃賽特別醒神，喺歐聯及西盃加埋已有3球進帳，多過西甲入波數字；至於尼馬亦愈踢愈弗，助攻入波瓣瓣掂，今仗又係佢哋發威時候。
危急關頭 擺雙箭搏殺

馬體會雖然以防守硬淨見稱，但其實進攻亦好銳利，上圈淘汰皇馬，就係以快速三角短傳，有效撕開對手防線。巴塞防守麻麻，尤其是雙閘輕出，令馬體會快翼基沙文有機可乘。加上費蘭度托利斯愈來愈上力，亦可以成為球隊一大殺着。

雖然普遍輿論認為教練施蒙尼今仗未必派晒文迪蘇傑同費蘭度托利斯正選上陣，但上仗西甲對弱隊ＣＦ格蘭納達，施帥已嘗試以兩人同時披甲攻堅，反映佢有計劃用雙箭頭戰術，一旦落後，兩位射手應會一齊搏殺，入波唔成問題。