南韓大把本錢夠贏烏茲別克

猪拉多纳

今日亞洲盃8強大戰頭炮南韓硬撼烏茲別克，小組3戰全勝嘅南韓再有中場主力具滋哲緣盡亞洲盃。不過「太極虎」贏完東道主澳洲後士氣大振，今場對住「私房菜」烏茲別克，有力贏波晉級。

（now 671周四下午3時30分直播）
具滋哲傷退未驚過

繼副隊長李青龍喺分組賽首仗整傷右側脛骨退隊後，另一中場大將具滋哲亦喺上場對澳洲手肘韌帶撕裂，提前退出呢項大賽。雖然「太極虎」咁黑仔，但主帥史泰歷克就相信球隊會迎難而上，認為上場擊敗澳洲、以全勝姿態殺入8強令球員信心大增：「我哋上場展現咗必勝嘅決心，每位球員都團結一致，只要keep住呢種心態就無論對邊隊都唔驚！」
往績一面倒 正宗私房菜

其實南韓又真係唔使驚烏茲別克喎，雙方對上11次喺國際A級賽事交鋒，「太極虎」取得8勝2和1負嘅壓倒性優勢，心理上先贏一仗，況且南韓冇咗李青龍同具滋哲，都仲有奇誠庸、孫興民等猛人壓陣，有足夠實力同烏茲別克鍊過。

烏茲別克球員雖然身材高大，但略嫌技術不足，進攻亦缺乏創造力，面對住防守力強、小組3戰零失球嘅南韓，想爆冷真係好難，一於撐南韓主W啦！