拉素上盤送佢一程

猪拉多纳

恩沙基步阿里基後塵拎金貘獎

ＡＣ米蘭大崩潰，球員散水、教練恩沙基變過街老鼠！ＡＣ今年聯賽未開齋，早前搞到要賣隊巴、裁走球員慳錢，意國電視台落井下石，街頭狙擊恩沙基，頒發代表「最失敗」嘅金貘獎畀佢，可知呢位41歲少帥飯碗危危乎。有傳如果ＡＣ米蘭今晚意甲作客輸畀拉素，老闆貝魯斯干尼就會請恩帥食無情雞，由前羅馬教練史巴列堤接手。
ＡＣ變賣家當 新球場等冠名

ＡＣ近期頻頻出招開源節流，除恥辱性出售隊巴外，仲送走費蘭度托利斯、沙普拿拉、麥巴耶尼安等人。而雲堅基爾、艾辛亦可能被放棄，希望減少人工支出。另外將來新球場落成後，唔會用招牌「聖西路球場」，而係等冠名贊助。但隊波成績咁曳邊有人肯買，教練恩沙基成眾矢之的，獲頒金貘獎後前途更悲觀，事關前任主帥阿里基就係獲此「殊榮」後被炒。

有消息指貝魯斯干尼已計劃換帥，仲鎖定人選為史巴列堤，依家只係等機會出手。ＡＣ歇冬後3場聯賽1和2負，如果今場輸埋畀前列分子拉素，爭取參加下屆歐聯機會更加渺茫，自然可順理成章炒恩沙基。ＡＣ今晚作客拉素，有得受讓平半，唔好以為好筍，以球隊現時頹勢睇怕難翻身，寧揀拉素上盤。

（TVB 301周日凌晨3時45分直播）