南韓冇攻細 老鼠「拉」龜

猪拉多纳

亞洲盃4強大戰今日開打，南韓喺悉尼對伊拉克，玩1.43倍入球細最實際。雖然南韓王牌孫興民喺8強加時階段梅開二度，但由於李青龍同具滋哲因傷提早退隊，「太極虎」變咗「無牙老虎」你咪話唔驚，撞啱伊拉克隊長尤尼斯冇態，唔似多波入囉！

（now671台周一下午5:00直播）

以90分鐘計算，亞洲盃8強嘅4場比賽全部開入球細，當中南韓加時2:0砌低烏茲別克，全靠利華古遜前鋒孫興民做救世主，但其實南韓全場到肉埋門唔多，睇得出保頓翼鋒李青龍同緬恩斯中場具滋哲傷退，對佢哋嘅影響好大，旨意未開齋嘅艾查殊前鋒李根鎬搵食，好難開到入球騷。
入波只靠孫興民

當然啦，孫興民連入兩粒後，比賽信心應該好番好多，但大家唔好忘記，如果齋計90分鐘賽事，其實佢已經連續10場國際賽冇波入，證明國家隊要佢靠邊，嚴重限制佢嘅入球能力，況且新領隊史泰歷克冇乜進攻板斧，感覺叻唔過洪明甫領軍嘅時候好多，想話炒起伊拉克輕鬆入決賽？難啲。
伊拉克體力輸蝕

伊拉克喺8強同伊朗激戰120分鐘踢成3:3，最後靠互射12碼淘汰對手，唔少球員踢到抽筋。更弊嘅係，隊長尤尼斯被阿爾阿里放棄後，已經成年冇班落，所以3場分組賽都喺下半場被換走，突然喺8強搏足120分鐘，隨時搞到佢今場爆偈，加上効力史雲頓中場嘅耶沙卡斯米停賽，所以入波唔慌多。
Data King：對賽半場旺0:0

‧兩隊對賽連續3次半場0:0。

‧南韓今屆4場比賽未失過波。

‧伊拉克今屆未試過半場領先、2次打和、2次落後。
乜都玩錦囊：玩埋1.92倍半和

南韓同伊拉克喺8強分別踢到加時同互射12碼，球員嘅體力應該未回復100%，雙方喺4強碰頭唔會上半場就鍊盡，否則下半場冇晒力就弊。假如大家對入球細冇興趣，揀1.92倍半場和其實都幾穩陣！
盤路解碼

南韓連續7場開半場細、全場細。