AC兵變博拉有着數

猪拉多纳

ＡＣ米蘭「兵變」，今晚意大利盃8強戰主場對拉素，認真危危乎！有傳ＡＣ多位老將密謀「造反」逼走教練恩沙基，隊長蒙杜利禾上仗聯賽疑似故意誤傳畀對手入波，搞到ＡＣ畀拉素反勝3比1。「紅黑兵團」球員已唔聽恩沙基支笛，隨時玩嘢再輸，一於捧拉素贏波添食。

（now 633周三凌晨3時45分直播）
老將玩嘢想逼走恩沙基

ＡＣ表現愈來愈頹，踏入2015年踢咗5場波，僅上圈意盃險勝薩斯索羅，老闆貝魯斯干尼已對恩沙基非常不滿，有意換帥。近日又爆出以蒙杜利禾、邦利拿、艾比亞迪為首嘅一班老將，想逼走恩沙基。ＡＣ上仗聯賽都係對拉素，喺領先下連失3球，輸波最關鍵係蒙杜利禾誤傳，令拉素攻入反超前1球，之後仲有麥薩斯領紅牌，果然有「兵變」迹象。ＡＣ內部立立亂，恐怕恩沙基一日唔執包袱，球隊都難翻身。

拉素今季演出醒神，高踞意甲第3位，目標直指下屆歐聯入場券，球隊踢得咁順自然心雄，唔會放過爭意盃。雖然拉素射手菲臘佐積域上仗受傷或要長抖，但仲有腳風非常順嘅莫利、菲臘安達臣，連老將高路斯上仗都有波入，足以再次摧毀ＡＣ防線。